FOTO: Bartolin vəzin absesi

2024-cü ilin mart ayında bizə 27 yaşlı xanım müraciət etmişdir.

Şikayətləri

Xəstə qasıq nahiyəsində, xüsusilə sağ böyük cinsiyyət dodağında ağrılardan şikayətlənirdi. Ağrılar cinsi əlaqə zamanı, çox gəzdikdə güclənir və sağ ayağa verirdi.

Xəstəlik tarixi — anamnez

Əlamətlər ilk dəfə 2023-cü ildə ortaya çıxıb. Xanım özünü müayinə etdikdə sağ böyük cinsiyyət dodağında kiçik ölçülü bir törəmə aşkarlayıb, amma heç bir şey etməmək qərarı verib.

Törəmə tədricən böyüyüb və xəstəni narahat etməyə başlayıb. Sağ ayağa verən dartıcı ağrılar əmələ gəlib. Pasient törəmənin üzərinə İxtiol məlhəmi ilə sarğı qoyub, lakin, bu, heç bir effekt verməyib. Yalnız bu vaxt qadın məsləhətxanasına müraciət edib və onu stasionar müalicəsinə göndəriblər.

Pasient normal şəraitdə yaşayır. Ginekoloji anamnezində problem yoxdur. Xroniki xəstəlikləri yoxdur.

Müayinə

Pasientin vəziyyəti qənaətbəxşdir, temperaturu — 37,2 °С-dir. Güzgülərlə baxdıqda heç bir patologiya aşkar edilmədi.

Xarici cinsiyyət orqanlarında 3,2 x 2.6 sm ölçüdə girdə törəmə qeyd olunur. Şiş bərkdir, mənfəzində maye təyin olunur. Törəmənin üzərində dəri örtüyü qızarıb, şişkin və ağrılıdır.

Qanın klinik analizində leykositlərin sayı və EÇS (eritrositlərin çökmə sürəti) artıb.

Qanın biokimyəvi analizi, sidiyin ümumi analizi, kiçik çanaq orqanlarının USM-i norma daxilindədir. Sifilis, SPİD, hepatit, qonokok, trixomonada və onkositologiya analizləri mənfi nəticə verib.

Qan qrupu — ikinci, rezus-faktor — müsbətdir, menstrual tsikl ikinci fazadadır.

Diaqnoz

Bartolin vəzin absesi, sağtərəfli.

Bartolinit haqqında eyni adlı məqaləmizdə daha ətraflı oxuya bilərsiniz.

Müalicə

Abses təcili şəkildə kiçik kəsiklə boşaldıldı, mənfəzi aseptik məhlullarla sanasiya olundu (yuyuldu) və rezin drenaj qoyuldu. Əməliyyatdan sonra antibakterial terapiya təyin olundu: Seftriakson məhlulu əzələdaxili yeridildi, yara antiseptik təsiri olan Furasilin məhlulu ilə yuyuldu.

Bartolin vəzin funksiyasını bərpa etmək üçün fizioterapiya kursu təyin olundu.

Pasient 3 gündən sonra klinikadan qənaətbəxş vəziyyətdə ev müalicəsinə keçirildi.

Növbəti gün pasient sarğıya gəldi. İltihab əlamətləri azalmışdır, drenaj yerində idi. Ona yaraya necə qulluq eləmək başa salındı və növbəti gəliş tarixi təyin olundu.

Bir həftə sonra müsbət dinamika qeyd edildi, pasientin şikayəti yox idi. Drenaj çıxarıldı.

1-2 həftə sonra yarada iltihab əlamətləri yox idi, şişkinlik və qızartı çəkilmişdi.

Yekun

Bu klinik hadisə onu göstərir ki, şikayətlər yarananda uzatmaq olmaz, vaxtında həkimə müraciət etmək lazımdır. Çünki hər-hansı bir pozğunluqları yalnız bu yolla vaxtında aşkar edib düzgün müalicə seçmək və həyat tərzini korreksiya etmək olar.