Hamiləlikdə mədə qıcqırması – göynəməsi

Orqanizm üçün hamiləlik zamanı baş verən sürətli dəyişikliklərə uyğunlaşmaq asan deyil. Buna görə də, tez-tez qeyri-adi və xoşagəlməz hisslər yaranır.

Hamiləlikdə mədə göynəməsinin əlamətləri

Əgər yeməkdən sonra sizdə döş sümüyünün arxasında göynəmə, ağızda acılıq, mədədə isə ağırlıq hissi olunursa – bu, mədə göynəməsidir. O, eyni zamanda ürəkbulanma, boğazda xoşagəlməz hisslər, udmanın çətinləşməsinə səbəb ola bilər. Oxşar əlamətlər qəflətən əyilib-qalxdıqda və yeməkdən dərhal sonra uzandıqda da olur.

Bəs nə üçün hamiləlik vaxtı mədə göynəməsi olur?

Turş mədə möhtəviyyatı qida borusuna düşüb onun selikli qişasını qıcıqlandırdıqda (mahiyyət etibarilə kimyəvi yanıq baş verir) – göynəmə başlayır. Bu cür sağlam insanlarda olur. Hamilələr üçün daha çətin olur, çünki, uşaqlıq əzələlərini boşaldaraq erkən doğuşların qarşısını alan progestron hormonunun yüksək miqdarı, digər orqanların saya əzələlərinə də təsir edir, məsələn, qida borusunu mədədən ayıran sfinkteri boşaldır və nəticədə turş mədə möhtəviyyatı qida borusuna asanlıqla keçərək onu zədələyir.

Bundan başqa, qida borusuna hamiləliyin erkən dövrlərində rast gəlinən toksikoz zamanı baş verən qusmalar təsir edir. Uşaqlığın böyüməsi də ətraf toxumalara, yəni, qida borusu və mədəyə təsir edir: tədricən onların yeri daralır, məhz bu səbəbdən göynəmə əlamətləri dölün artıq böyük olduğu dövrlərdə – 20 həftədən sonra daha çox ortaya çıxır.

Hamiləlik zamanı göynəmənin öhdəsindən necə gəlmək olar?

Bundan ötrü bir neçə sadə üsul var.

Birincisi, sizi müşahidə edən mama-ginekoloq çox güman ki optimal pəhriz məsləhət görəcək – rasiondan yağlı, acı, turş, qızartmalı, bitki lifləri çox olan (kələm, noxud, paxla, lobya, mərci, qara çörək, çovdar çörəyi, turp), şirin və qazlı sular, şokolad, kofe və alkoqolu çıxartmaq lazımdır.

İkincisi, qida rejimi dəyişilməlidir: az-az və tez-tez, gündə 5-6 dəfə yemək lazımdır. Göynəmə zamanı südturşusu məhsulları, balıq, yağsız ət, tərəvəz, quru meyvə, kompot yaxşı kömək edir.

Gün ərzində mümkün qədər çox maye qəbul edilməlidir, amma sonuncu dəfə yatmazdan 3-4 saat qabaq içmək olar. Hündür balışda yatmaq yaxşıdır, gecə göynəmə başlayarsa – durub bir qədər gəzmək olar. Vertikal vəziyyətdə qida borusuna düşmüş turş mədə möhtəviyyatı mədəyə asan qayıdır.

Yeri gəlmişkən, bu səbəbdən hamiləlik dövründə qaməti düz saxlamaq daha yaxşıdır: onurğa nə qədər düz olarsa, mədə və qida borusuna təzyiq də, bir o qədər az olar. Buna görə də, sıx paltarlardan imtina etmək lazımdır: qarın boşluğu orqanları onsuz da yaxşı vəziyyətdə deyil, onları bir az da sıxmaq heç də düz deyil.

Bütün hallarda əhvalın pozulmaları haqqında hamiləliyi aparan həkim xəbərdar olmalıdır. Ağrı pristupları zamanı təsir edə biləcək dərmanı məhz o seçəcək. Eyni zamanda, qastroenteroloqun konsultasiyası tələb oluna bilər. Amma çox güman ki, xoşagəlməz hisslərdən tamamilə, yalnız doğuşdan sonra can qurtarmaq mümkün olacaq.

Hamiləliyin müxtəlif dövrlərində mama-ginekoloqun məsləhətləri barədə digər məqaləmizdə oxuya bilərsiniz.

Mədə göynəməsi olduqda hansı dərmanlar kömək edər?

Nəzərə alsaq ki, göynəməni turşu törədir, əsas məsələ – bu turşunu neytrallaşdırmaqdır. Uyğun olaraq, ən lazımi preparatlar – antasidlərdir, yəni turşuluğu azaldan dərmanlar. Müasir təbabətdə kalsium və maqnezium birləşmələri istifadə olunur, məsələn, "Renni" preparatı, hansı ki, turşuluğu neytrallaşdırır və hamilələrə vermək olar.

Həmçinin həkim müalicəvi mineral sular təyin edə bilər, onsuz da hamiləlik zamanı çoxlu maye qəbul etmək lazımdır.

Xalq təbabəti

Bu məqsədlə xalq təbabəti vasitələrindən də istifadə etmək olar. Amma, hər-hansı bir müalicə üsulu tətbiq etməzdən öncə, müalicə həkiminizlə məsləhətləşməlisiniz. Yadınızda saxlayın ki, mədə göynəməsi müvəqqəti problemdir və o sizin əhvalınızı çox pozmamalıdır.