Menstruasiya dövründə cinsiyyət üzvlərinin gigiyenasına xüsusi diqqət yetirilməlidir. Düşünürəm ki, xarici cinsiyyət orqanların requlyar yuyulması və alt paltarının dəyişdirilməsinin vacibliyini xatırlatmağa ehtiyac yoxdur. Mən, burada yalnız gigiyenik vasitələrin seçimi barədə məsləhətlərimi vermək istəyirəm.

Menstruasiya haqqında "Menstruasiya haqqında qısa məlumat" adlı məqaləmizdə oxuya bilərsiniz.

Gigiyenik bezlər

Satlşda "kritik" günlərdə qadının özünü rahat hiss etməsi üçün müxtəlif gigiyenik vasitələr mövcüddür. Bunların arasında gigiyenik bezlər ideal vasitə hesab olunur. Onlar qalınlığına (3 mm-dən 12 mm-ə qədər), formasına, strukturuna, hopdurduğu mayenin miqdarına görə fərqlənir. Həmçinin bezlər "qanadlı" və "qanadsız" olur.

Bezin seçilməsi çox sadədir. Qadının özünə hansı rahatdırsa, onu da istifadə etməlidir. Müasir dövrdə ən keyfiyyətli və yayılmış bezlər Always, Libresse, Cotex-dir.

Bezləri necə seçməli?

Hər bir qadın öz aybaşı qanaxmasının miqdarını bilir. Bez seçərkən bunu mütləq nəzərə almaq lazımdır. Hopdurma qabiliyyətinə görə bezlərin üç növü ayırd olunur: NORMAL, SUPER və SUPER PLYUS (NİGHT). Lakin istehsalçıdan asılı olaraq hopdurma əmsalı və onun adı fərqlənə bilər.

Menstrual qanaxması çox olan qadınlara daha çox SUPER və SUPER PLYUS bezlərindən istifadə etmək məsləhət görülür. Belə hallarda, həmçinin gecə yuxusu zamanı "qanadlı" gecə bezlərindən istifadə etmək məqsədəuyğundur. Cinsi həyat yaşamayan cavan qızlara NORMAL bezlərdən istifadə etmək olar.

Bezi hansı tezliklə dəyişmək lazımdır?

Bu təkcə estetik əhəmiyyət daşımır, belə ki, aybaşı qanı müxtəlif mikroorqanizmlərin inkişafı üçün ideal mühitdir. Bu dövrdə uşaqlıq boynu cüzi açılmış olur və xaricidən mikroorqanizmlərin daxilə keçməsinə heç bir maneə yaratmır. Bezlər nə qədər tez-tez dəyişilərsə, mikroorqanizmlərin daxili orqanlara keçmə ehtimalı, bir o qədər az olar.

Bezin tam "qırağına qədər" dolmasını gözləmək düzgün deyil, üçdən biri dolduqda onu dəyişmək lazımdır. Hər dəfə bez dəyişildikdə xarici cinsiyyət üzvlərinin yuyulması vacibdir. Bunun üçün xüsusi intim sabun və ya uşaq sabunlarından istifadə etmək məsləhət görülür ki, selikli qişa qıcıqlanmasın.

Həmçinin nəzərdə saxlamaq lazımdır ki, tampondan fərqli olaraq, bezlərin istifadəsi zamanı bəzi bağırsaq bakteriyalarının uşaqlıq yoluna keçmə ehtimalı artır. Buna görə də, "böyük bayıra" getdikdən sonra, o mütləq yenisi ilə əvəz olunmalıdır. Belə etsəniz, öz orqanizminizi mikrobların arzuolunmaz müdaxiləsindən güvənli qorumuş olarsınız.

Gündəlik istifadə üçün olan bezlər

Gündəlik istifadə üçün olan nazik bezlər çox gözəl ixtiradır. Onlar uşaqlıq yolunun normal ifrazatını hopduraraq, alt paltarlarını sarı ləkələrdən və xoşagəlməz qoxulardan qoruyur. Belə bezlər istifadə üçün rahatdır və hiss olunmur. Hazırda satışda müxtəlif növ alt paltarları uyğun, qara rəngli, xüsusi aromatik əlavəsi olan bezlərə də rast gəlmək olar.

Gündəlik istifadə üçün olan bezlər doğuşdan sonrakı və klimakterik dövrdə tez-tez rast gəlinən, qeyri-iradi sidikqaçırma zamanı əvəzedilməzdir. Belə bezləri qadınlar requlyar dəyişməklə, özlərini rahat və güvənli hiss edirlər. Əgər menstruasiyanın son günlərində ifrazat çox azalarsa, adi bezləri gündəlik nazik bezlərlə əvəz etmək olar.

Gigiyenik tamponlar

Tamponlara gəldikdə, onların istifadəsi vaxtla məhdudlaşdırılmalıdır! Reklam çarxlarında tamponların sadəliyi və rahatlığı barədə çox danışılır, amma ziyanları yada düşmür. Məsələ burasındadır ki, menstrual qan mikroorqanizmlər üçün çox əlverişli mühitdir. Tamponu uzun müddət saxlamaqla, siz özünüz mikrobların uşaqlıq yolunda inkişaf etməsi üçün ideal şərait yaradırsınız. Buna görə də, tamponu uşaqlıq yolunda 3-4 saatdan artıq saxlamaq olmaz.

Tamponu uşaqlıq yolunda 3-4 saatdan artıq saxlamaq olmaz!

Eyni zamanda, uşaqlıq yoluna yad cismin daxil edilməsi qıcıqlanma və iltihab – vaginit və ya kolpit törədə bilər. Təbiət qadının daxili cinsiyyət üzvlərini elə yaratmışdır ki, o, özü-özünü daimi təmizləyir. Uşaqlıq yolu xaricdən kiçik cinsiyyət dodaqları vasitəsilə sıx örtülən boş borudur. Uşaqlıq boynu ilə vağına isə, xüsusi maye ifraz edərək uşaqlıq yolunu daimi təmizləyir. Buna görə də, menstruasiya qurtardıqdan bir neçə saat sonra burada qanın izi də qalmır. Tamponun yeridilməsi isə, bu cür təbii müdafiə mexanizmini pozmuş olur.

Həm də, hələ cinsi həyat yaşamayan qız uşaqlarına tampondan istifadə etmək olmaz. Çünki, uşaqlıq və artımlara xaricdən infeksiyanın daxil olmasının qarşısını alan, qızlıq pərdəsinin tamlığı qorunmalıdır.

Hansı tamponlardan istifadə etmək olar?

Hər bir qadın üçün aybaşı qanaxmasının miqdarı tsiklin müxtəlif günlərində eyni olmur. Siz, hopdurma qabiliyyəti sizin üçün maksimum olan tampondan istifadə etsəniz, özünüzü rahat və sərbəst hiss edərsiniz. Bunu müəyyən etmək üçün çox da böyük təcrübə lazım deyil. Bizim apteklərdə üç növ tampon satılır: NORMAL – zəif və orta aybaşı, SUPER – orta və çox aybaşı, SUPER PLUS – həddindən artıq olan aybaşı qanaxması üçün. Seçimə ən yaxşısı NORMAL ilə başlamaqdır. Əgər tampon 3 saatdan az müddətdə tam dolursa, demək sizə daha çox hopdurma qabiliyyətinə malik tampon lazımdır.

Tamponu neçə saatdan bir dəyişmək lazımdır?

Əgər sizə uyğun tampon istifadə edirsinizsə, neçə saatdan bir dəyişmək lazım olduğunu özünüz hiss etməlisiniz. Yox, əgər sizin ifrazatınız çox az olursa, əvvəl dediyim kimi, tamponu içəridə 3-4 saatdan artıq saxlamaq olmaz. Burda da vəziyyət bezlərdəki kimidir, nə qədər tez-tez dəyişilərsə və gigiyenik yuyunma olarsa, sizin sağlamlığınız üçün, bir o qədər yaxşı olar.

Tampon özündə qan saxladığına görə, onu unitazın və ya vannanın üzərində çıxartmaq lazımdır. Onu çıxardıqdan sonra bir müddət gözləmək lazımdır ki, qan xaricə axsın, sonra xüsusi intim və ya uşaq sabunu ilə yuyunmaq məsləhət görülür. Tamponun istifadəsi zamanı sprinsevasiya və digər gigiyenik prosedurlar tələb olunmur.

Tamponu gecə istifadə etmək olarmı?

Mən bunu məsləhət görməzdim. Nəzərə alsaq ki, tampon maksimum 4 saat “işləyir”, bu vəziyyətdə gigiyenik bezlər daha məsləhətlidir. Ancaq, əgər siz, gecələr durub tamponu dəyişə bilirsinizsə, onda qorxmadan onlardan istifadə edə bilərsiniz.

Tampon uşaqlıq yolunda ilişib qala bilərmi?

Xeyr, bu mümkün deyil. Tamponun sapı çox möhkəmdir. O, 5 kg-a qədər yük saxlaya bilər. Eyni zamanda uşaqlıq boynu dəliyi kiçik olduğu üçün, tamponu uşaqlığın içərisinə buraxa bilməz.

Gigiyenik tamponlardan istifadə təhlükəlidirmi?

Xeyr, təhlükəli deyil. Amma bütün qaydalara ciddi riayət etmək lazımdır. Təcrübəniz yoxdursa, applikatorla olan tamponlardan istifadəyə üstünlük verin. Əgər tamponu yeritdikdən dərhal sonra, bir qədər diskomfort hiss edirsinizsə, narahat olmayın, bu müvəqqətidir. Çox güman ki, siz onu lazımi qədər dərinə yeritməmisiniz. Belə, kifayət qədər təcrübə olmadıqda olur. Amma tamponun istifadəsi əslində çox sadə və təhlükəsizdir.