Mini-abort və ya vakuum-aspirasiya – döl yumurtasını xüsusi vakuum sovurucusu ilə sovurularaq arzuolunmaz hamiləliyin erkən mərhələlərdə (5 həftəyə qədər) pozulmasıdır. Bu üsul qadın orqanizmi üçün adi tibbi (cərrahi) aborta nisbətən daha təhlükəsizdir, çünki ondan sonra uşaqlığın zədələnməsi, qanaxma və infeksiya düşməsi kimi fəsadlar çox az rast gəlinir.

Ümumiyyətlə hamiləlik müddəti nə qədər yüksək olarsa, onun pozulmasından sonra ağırlaşma riski də bir o qədər yuxarı olur. Çünki hamiləliyin erkən mərhələlərində uşaqlığın və döl yumurtasının ölçüləri kiçik olur. Əgər hamiləlik vakuum-aspiratorla 5 həftəyə qədər pozularsa, onda uşaqlığın divar və damarları az zədələnir və orqanizm çox tez bərpa olur.

Mini-abortun üstünlükləri

• hamiləliyin erkən mərhələlərində mümkünlüyü;
• əməliyyatı həm ümumi (venadaxili narkoz), həm də yerli anesteziya altında etmək olar;
• davam müddəti 5-7 dəqiqədən çox çəkmir (hazırlığı nəzərə almadan);
• döl yumurtasının xaric edilməsi vakuum-sovurucu ilə aparılır, metal küretlə qaşınmır;
• sovurma yumşaq, plastmass kanyula ilə aparılır, hansı ki, uşaqlığa ciddi zədə vurmur;
• mini-abort zamanı uşaqlıq boynu genəldilmir, ona görə də onun əzələ aparatı zədələmir və gələcək hamiləliklər zamanı adəti düşüklər baş vermir;
• mini-abortdan sonra uşaqlığın sağalma dövrü tibbi abortdan sonrakına nisbətən çox azdır;
• sonsuzluğa səbəb olan ağır fəsadlar vermir.

Mini-aborta hazırlıq

İlk öncə qadın ginekoloqa müraciət etməlidir ki, hamiləliyin olması təyin edilsin. Ola bilər ki, aybaşının ləngiməsi yumurtalıq funksiyalarının pozulması ilə əlaqədardır. Hamiləliyin olması xüsusi ekspres-testlə və ya USM-lə (vaginal qəbuledicilə) təyin edilir. Həkim dəqiq bilməlidir ki, hamiləlik uşaqlıqdankənar deyil!

Mini-abortdan qabaq mütləq həkimin müayinəsindən keçilməli və lazımi analizlər verilməlidir. Mini-aborta əksgöstərişlərə ginekoloji, iltihabi və infeksion xəstəliklər aiddir.

Hamiləliyin pozulması əməliyyatının uğurla keçməsi üçün müəyyən şərtlər tələb olunur. Birincisi, abortu gecikdirib son günə saxlamaq olmaz. Həkimə nə qədər tez müraciət etsəniz, bir o qədər yaxşıdır! Əks halda ola bilər ki, vakuum-aspirasiya kifayət eləməsin və əlavə qaşınmaya ehtiyac yaransın.

DİQQƏT!!!
Mini-abort mütləq USM nəzarəti altında edilməlidir. Bu zaman həkim döl yumurtasını görür və kanyulanı bilavasitə ora yönəldir. Əks təqdirdə əməliyyat alınmaya bilər.

Mini-abortdan sonra

Mini-abortdan sonra qadın minimum yarım saat uzanıqlı olmalıdır (əsas da ümumi narkozdan sonra), 3-4 saatdan sonra isə o, adi həyat tərzinə qayıda bilər. Amma, bəzi tədbirlərə ciddi əməl etmək lazımdır. Bu, sonrakı fəsadların qarşısını almağa imkan verir.

DİQQƏT!!!
Əgər mini-abortdan sonra qarnın aşağısında ağrı və ya cinsiyyət yolundan qanlı ifrazat olarsa, mütləq həkimə müraciət edin. Bu, uşaqlıqda qalıq qalmasına işarə ola bilər.

Qadınların çoxsunda mini-abortdan 2-3 gün sonra aybaşı qanına bənzər ifrazat gələ bilər, lakin bu menstruasiya deyil, orqanizmin abortdan sonrakı hormonal dəyişikliklərə özünəməxsus reaksiyasıdır.

Bir həftə sonra ginekoloqun qəbuluna gəlmək lazımdır, çünki mini-abortdan sonra qadınların 1%-ində hamiləlik uşaqlıqda və ya uşaqlıqdankənar davam edə bilər. Bu o zaman olur ki, abort çox erkən dövrlərdə edilir və ya həkim USM nəzarətindən istifadə etmir, ya da ki, uşaqlıqdankənar hamiləlik olmuş olur.

Abortdan sonra altı ay ərzində ginekoloqun qəbulunda ən azı üç dəfə olmaq lazımdır. Həkim abortun orqanizmə vurduğu "zərəri" təyin edib xüsusi bərpaedici müalicə təyin edir.

Bizim qiymətlərimizlə tanış olun.