FOTO: Hamiləlik zamanı sidikdə zülal

Hamiləlik zamanı qadın öz sağlamlığına nəzarət etməlidir, çünki, bundan həm özünün, həm də uşağın sağlamlığı asılıdır. Normada hamilə qadınların sidiyində zülal aşkar olunmur və o əmələ gəldikdə orqanizmdə müəyyən problemlərin olmasından xəbər verir. Sidikdə zülal analizi nə üçün vacibdir və hamiləni hansı fəsadlardan qoruyur?

Hamiləlik başlayandan qadın orqanizmində böyük dəyişikliklər baş verir. Beləki, müxtəlif orqan və sistemlərə əlavə yük düşür. Böyrəklər – hamiləlik zamanı yüksək gərginlikdə işləyən orqanlardır, buna görə də, onlara nəzarət daha diqqətli olmalıdır.

Böyrəklərdə gedən prosesləri sidiyin analizi ilə müşahidə etmək olar. Məhz bu analiz həm böyrəklərin, həm də ümumən sidik-ifrazat sisteminin hansı vəziyyətdə olduğunu göstərir.

Əgər sidikdə zülal aşkar olunursa, daha dərin müayinələrdən keçmək lazımdır. Yox, əgər göstərici çox qalxmayıbsa, narahat olmağına dəyməz, çünki, hamilə qadınların sidiyində az miqdarda zülalın olması norma sayılır.

Hamiləlik zamanı sidikdə zülalın normal göstəricisi 0,033 q/l hesab edilir. Əgər göstərici bundan yuxarıdırsa, mütləq öz həkiminizlə konsultasiya etməlisiniz.

Sidikdə zülalın səbəbləri

Nə qədər təəccüblü olsa da, sidikdə yüksək zülalın səbəbi materialın düzgün yığılmaması ola bilər. Nəticənin düzgün alınması üçün sidik yığılmazdan qabaq cinsiyyət orqanları yaxşı yuyulmalıdır.

Sidikdə zülalın olmasının bir səbəbi də hamilə qadının qida rasionu ola bilər, hansı ki, əsasən zülali tərkibli olur. Buna görə də, analiz verməzdən qabaq tərkibində zülal çox olan qidalar, məsələn, kəsmik, ət, yumurta çox yeyilməməlidir.

Sidikdə zülalın miqdarına təsir edə biləcək səbəblərdən biri də stress vəziyyətləridir.

Güclü fiziki gərginlik sidikdə zülalın miqdarını qaldıra bilər, lakin bu hal təbii ki, müvəqqətidir.

Hamiləlik zamanı sidikdə zülalın konsentrasiyası sidik-ifrazat sisteminin yanaşı gedən xəstəliklərində qalxa bilər. Pielonefritin kəskinləşməsi zamanı qanın analizində eyni zamanda leykositlərin artması müşahidə olunur.

Sidikdə zülalın yüksək olmasının daha bir səbəbi hamiləlik toksikozudur. Bu patologiya barədə daha ətraflı "Hamiləliyin gec mərhələlərində toksikoz – ehtiyatlı olun, normal deyil!" məqaləmizdə oxuya bilərsiniz.

Anlamaq vacibdir ki, sidikdə zülalın qalxması ilə gedən bəzi xəstəliklər var və onların əksəriyyəti həm hamilə, həm də onun körpəsi üçün ölümcül təhlükə törədə bilər.

Hamiləlik zamanı sidikdə zülalın artmasını necə müalicə etməli

Əgər sidiyin analizi zülalın miqdarında kənaraçıxma vermişsə, mütləq qaydada həkimə müraciət etməlisiniz. Həkim təkrar müayinə təyin edəcək və onun nəticələrinə əsasən sizə ya uyğun müalicə yazacaq, ya da konsultasiya üçün digər mütəxəssislərə göndərəcək. Bu halda özünümüalicə ilə qətiyyən məşğul olmaq olmaz, beləki, bu ağır və hətta geriyədönməz fəsadlarla nəticələnə bilər.

Əgər həkim hamilədə pielonefrit əlamətləri aşkarlayarsa, iltihabı götürmək üçün adətən xüsusi pəhriz və medikamentoz müalicə təyin edir. Gecikmiş hallarda antibiotik təyin edilə bilər.

Hamiləlik toksikozu kimi ağır xəstəliklər aşkar edildikdə, yüngül müalicə ilə keçinmək mümkün olmayacaq, hətta bəzi hamilələr hospitalizasiya olunub, doğuşa qədər həkimin daimi nəzarətində saxlanila bilər.

Əgər kəskin erkən toksikoz başlayarsa, həkimlər hamiləni qorumaq üçün adətən hamiləliyin süni pozulması – abort məsləhət görür. Əgər hamilə qadın bundan imtina edərsə, həkimlər onun daimi nəzarətdə qalmasına və doğuşun yalnız keysəriyyə yolu ilə sonlandırılmasına qərar verir.

Sidikdə zülalın qarşısını necə almaq olar?

Bundan ötrü aşağıdakı sadə qaydalar var:

• Xüsusi qida rejiminə əməl etməli, rasiondan tünd çay, kofe, şokolad, duzlu, hisə verilmiş, yağlı, qızardılmış, acı qidaları, qazlı suları çıxartmalı.
• Bədən çəkisinə gündəlik çəkilməklə ciddi nəzarət etməli.
• Arterial təzyiqə gündə iki dəfə ölçməklə nəzarət etməli.

Sidikdə yüksək zülal aşkar edildikdə üzülmək və ruhdan düşmək lazım deyil. Vaxtında başlamış müalicə demək olar ki həmişə müalicənin uğurla getməsinə zəmanət verir.